Молитва о прощении греха цареборчества и молитва о спасении России
Молитва о прощении греха цареборчества
Благословен еси, Господи Боже Отец наших, и хвально и прославлено имя Твое во веки. Яко праведен еси о всех, яже сотворил еси нам, и вся дела Твоя истинна и прави путие Твои, и вси суди Твои истинни: и судьбы истинны сотворил еси по всем, яже навел еси на ны грех ради наших. Яко согрешихом и беззаконновахом отступивше от Тебе, и прегрешихом во всех, и заповедей Твоих не послушахом, ниже соблюдохом, ниже сотворихом, якоже заповедал еси нам. И отрекошася, и отступиша, и поношаша, и на поругание и на смерть предаша помазанника Твоего, егоже избрал Ты еси во еже милостивно царствовати и право правити людем Твоим, и хранити Святую Церковь Твою, и держати весь мiр от человека греха, сына погибели. И предал еси нас в руки врагов беззаконных, мерзких отступников, и человеком неправедным и лукавнейшим паче всея земли. Яко умалихомся паче всех язык земных грех ради наших, и несть во время сие начальника, пророка и вождя. И ныне возследуем всем сердцем и боимся Тебе и ищем лица Твоего. Не предаждь нас до конца имене Твоего ради, и не разори завета Твоего, и не отстави милости Твоея от нас, но сотвори с нами по кротости Твоей, и отпусти грех людей Твоих, не возбранивших убиение Царя и помазанника Твоего, и избави страждущую страну нашу от лютых безбожник и нечестивыя власти их и возстави Престол Православных Царей, покори под нозе их всякаго врага и супостата. И да посрамятся вси являющии рабом Твоим злая, и да постыдятся от всякия силы и крепость их да сокрушится, и да разумеют вси, яко Ты еси Господь Бог наш, един и славен по всей вселенней, аминь.
Молитва о спасении России
Господи Иисусе Христе, Боже наш, приими от нас недостойных рабов Твоих усердное моление сие, и, простив нам вся согрешения наша, помяни всех врагов наших, ненавидящих и обидящих нас, и не воздаждь им по делом их, но по велицей Твоей милости обрати их: неверных ко правоверию и благочестию, верных же во еже уклонитися от зла и творити благое. Нас же всех и Церковь Твою Святую, всесильную Твоею крепостию от всякаго злаго обстояния милостиво избави. Отечество наше от лютых безбожник и власти их свободи, и возстави Престол Православных Царей, верных же рабов Твоих в скорби и печали день и нощь вопиющих к Тебе, многоболезненный вопль услыши, многомилостиве Боже наш, и изведи из истления живот их, и отпусти грех людей Твоих, отрекшихся от Царя и помазанника Твоего, и не возбранивших убиение его. Подаждь же мир и тишину, любовь и утверждение и скорое примирение людем Твоим, их же честною Твоею кровию искупил еси. Но и отступившим от Тебе и Тебе не ищущим явлен буди, во еже ни единому от них погибнути, но всем им спастися и в разум истины приити, да вси в согласном единомыслии и в непрестанной любви прославят пречестное имя Твое, терпеливодушне, незлобиве Господи, во веки веков. Аминь.